Ku saabsan Majaladda Marag
Hordhac
Majalladda Marag, waa madal warbaahineed loogu talagalay in lagu daabaco macluumaad kala duwan sida warbixino, falanqayno, iyo aragtiyo ay diyaariyeen dad kala duwan oo ka tirsan bulshada, sida cilmi-baarayaal, suxufiyiin, aqoonyahano, hal-abuurro, iyo dadka kale oo khibrad iyo aqoon u leh dhinacyada kala duwan ee taabanaya nolosha bulshadeena.
Majaladan ujeedkeedu waa in la helo madal ka duwan warbaahinta dalka ka jirta, kuwaas oo inta badan xoogga saara soo tebinta dhacdooyinka maalinlaha ah. Majalladdan waxay hiigsaneysaa inay bulshada u gudbiso macluumaad dhigaal noqda, waxtar leh oo kor u qaada wacyiga iyo fahamka bulshada, kobciya doodaha iyo aragtiyaha caafimaadka qaba, soo bandhiga dhaliilo wax dhisaya oo daahfuran, islamarkaana dhiirrigeliya bulshada gaar ahaan dhallinyarada, si ay u noqdaan kuwo xog ogaal ah, si buuxda u fahma xaaladda dhabta ah, una gaari karaan go'aammo sax ah oo noloshooda iyo bulshada wax ku ool u ah.
Marag waxay ka madax-bannaan tahay aragtiyaha siyaasadeed ee kala duwan ee dalka ka jira, waxayna u furan tahay qof kasta oo doonaya inuu bulshada la wadaago fikrado, warbixino iyo falanqayno ku salaysan aqoon, cilmi iyo waayo-aragnimo.
Tifaftiraha Guud
Abdi Omar Bile
Tifaftiraha Guud
Cabdi Cumar Bile waa suxufi leh khibrad ka badan 15 sano oo dhinaca isgaarsiinta dijitaalka ah ah, iyo cilmi-baare fadhigiisu yahay magaalada Garoowe, kaasoo haysta shahaadada Master-ka ee Journalism and Mass Communication. Waa aasaasaha bog-wareedka madaxa-bannaan ee Puntland Mirror. Cabdi sidoo kale waxa uu la soo shaqeeyay warbaahinta caalamiga ah ee Bloomberg, iyo Machadka Swisspeace ee Switzerland, halkaas oo uu muddo hal sano ah cilmi-baare uga ahaa Soomaaliya.
Hadda waa Agaasimaha Isgaarsiinta ee machadka cilmi-baarista ee SIDRA Institute. Cabdi waxa uu leeyahay khibrado warbaahineed oo kala duwan, sida baarista (Investigative Journalism), gaar ahaan xog-ururinta iyo xog-falanqaynta laga sameeyo ilo-wareedyada dadweynaha ee furan (Open-Source Intelligence – OSINT), oo uu tababar sare ka qaatay Global Investigative Journalism Network (GIJN), iyadoo qayb ka mid ah baaritaannada uu sameeyay lagu daabacay Puntland Mirror.
Sidoo kale, waxa uu leeyahay xirfadda baaritaanka xaqiiqada (Fact-Checking), isagoo lix bilood oo Fellowship ah, oo ay maalgelisay shirkadda Meta, ka qaatay Code for Africa (CfA), oo ah qaaradda Afrika hay’adda ugu weyn ee aan faa’iido doonka ahayn ee taageerta Open-Source Intelligence (OSINT) iyo civic technology.
Cabdi waxa kale oo uu yahay alumnus ka tirsan Reuters Institute ee Jaamacadda Oxford, isagoo kamid ahaa Cohort 7 ee barnaamijka Oxford Climate Journalism Network (OCJN), taasoo siisay khibrad iyo aqoon ku saabsan tebinta arrimaha deegaanka iyo cimilada.
Hal-ku-dhigga Majaladda
Fikir Madax-bannaan, Aragti Qoto Dheer
- 204
- Maqaallo
- 19
- Caddad
- 72
- Qorayaal